عدت بكيفي

كلمتك عدت بكيفي لاتحسب انها شطاره**والله اني مانويت أجازي السيه بسيه

ولا نويت أقسى عليك وأنت ماعندك جساره** وش لك تكثر حطبها دام مالك مقدريه

من عرفت االعلم وأسمع الخبل هرجه د ماره**وأنت ثبت المقوله مية(ن)في صف ميه

ليتك اللي ماتكلم واحتفظ باقصى قراره**ولافتشت علومك اللي عرضتك المهمهيه

إيه شبت نارها والنار مبداها شراره**وأنت مثل اللي تهبد جوفها والنار حيه

عندنا للخبل منها ميسم ينطق حراره**نلحق بعلباه كيه ولا صرخ زدنا بكيه

إن صحا نفرح بشوفه وان غدا ماهي خساره**ماهو أغلى طروش جدي وروحةٍ من غير جيه

بس أنا عندي نصيحه خذها من باب الإعاره**لا تعزوا دام مالك لاشداد ولا مطيه

جيت يمي بالقسر وأبلاك ربي بالقساره**ولا أنا ماارضى الإهانه لاعليك ولا عليه

حاشمٍ نفسي واحشم اللي حشمني في وقاره**واحد لاجاك فازع ياسعد منهو خويه

واحد حافظ مقامه ولا التفت في بنت جاره**ولانصيته بالحذيه قال تبشر بالعطيه

ذاك لو تعطي يمينه مادرت عنها يساره**أجوديٍ مايجالس كود ناسٍ أجوديه

كل رجل وله ميول وكل نجم وله مداره**وكل سيفٍ له جتيره من عصور الجاهليه

والرجال أشكال وادري عرفهم مثل التجاره**بعضهم يغنيك عرفه وبعضهم لارحم حيه

والزمن نفس الزمان ولا تغير في مساره**الأوادم هي تغير طبعها صبح وعشيه

بس أنا باخر كلامي باختم بهذي العباره**الأصابع في يدينا لا حشى ماهي سويه
________________________________________ __________________________________



فيصل العدواني/عدت بكيفي




دمتم بود,,,,,,,,,,,,,,